13 settembre 2006
CXLIII - s. 66/12°
«Metà!»
Me mama véa el vizio inveterato
de esagerar senpre coe quantità,
me pare se difendéa senza tato:
«Checo, màgnitu pasticcio?» «Metà!»
Prima che ’a ghe revesesse sul piato
ogni pietanza lu diséa «Metà!»
«Atu caro fasioi col brasato?
o vutu un fià de formajo?» «Metà!»
Paréa na comica o na barżeeta
epur bastea che’l se desmenteghesse
na volta de risegnar ’a so feta
che’l se ritrovéa in t’el piato un pesse
grando come na casa o na polpeta
da kìo e na tecia de teghe lesse.
|