Mi, se me voté, come prima roba 
promete (e poé tocarme ’a goba)
che bute via el gazebo de fioreti 
in “Piazzetta Tuttavia”: i preti, 
lori, la ciama cussì. Don Perin
penséa a calcossa de mejo infin
de ’na Piazzetta Cynar, come dise 
quei che cita Calindri co ’e radise 
de carciofo stravacà col grog
in mezo a’e machine a spirar smog:
no ghe va mai nessun, te credo
a infumentarse come un spiedo,
sì e no fa el giro de’a fontana
i do tosatei co so nona grama 

E infine farò de tut (in ciaro o ae sconte) 
parché vegne fat el terzo ponte 
ma via dret da’a rotonda de Noventa 
fin al Piave e che de ’à el se senta 
giust so’a strada che porta zo Fossalta:
moderno co ’n’arcada, longa e alta.
E sol par quarto quel de ’a ferrovia
che no so che traffico el porte via.
E ciame artisti, no veìne fatue,
a meta partut obelischi e statue  
so’e piazze nove e so’e strade in parte
che ne fae a tutti respirar l’arte
de un progetto un fiàntin svejo e inteigente 
che no l’insulte pì el zervel de’a zente.

Da via Tredese Martiri fae “anda! 
tuti dreti!” e fae ’na piaza granda 
dato che quea manca davanti al duomo, 
po’ scaténe ’na caccia a Katal l’omo 
che da ani imbrata muri e recinti
de disegni stupidi e slogan finti
e subito dopo fae demoir ’a pitona 
de Janin Piloto, se Dio perdona, 
e fae n’altra piazza bea, e soto 
un parcheggio de sete piani, o oto 
che’l baste pa’ n’altri zento ani
e che’l cave i pensieri ai pori cani
che no trova mai dove assar el mezo
anca i Suv che ciava un posto e mezo

E po farò costruir un teatro
co na bea platea e almanco quatro
camerini e ciamarò artisti boni
(no quei del teatro dei Poglioni)
a recitar ’a commedia arcinota
de quel che tut farà se i lo vota.
E se de prometa me ciapa l’estro 
ciape ’a baea  e impare dal maestro:
se qua passa Silvio (magari in bici)
in quatro e quatr’oto mi cave l’ICI
Ma se infine qualchedun no me crede 
ché massa promesse no fa pì fede
el fae de manco de darme el sent,
tanto prometa... no me costa gnent.