21 luglio 2008

CCCLXXXIV/144 - sonetto 271/139
In morte di Karl Unterkircher
 
Dato che no ha speron cui picarse 
 ‘Nanga Parbàt’ l’é ‘montagna nuda’, 
’issa come un dente de crode sparse
contro el ciel ceèste che la desnuda; 

’a  ‘magnaòmeni’ pol ben vantarse
cofà un mostro che ingoia carne cruda
de ver subìo oto sconfitte scarse,
che se ’a man no pica el pìe no pudha:

ciechi la sfida e la risfida ’i omeni 
superbi; Ea li varda e no se lagna;
’i alpinisti, scordài i prolegomeni,

torna, sfida se stessi;  ’a montagna
li assa far, anzi ’a ghe zigna, ’i òmeni 
ghe casca e pó do tre éa  ’a s’i magna.