541/241^- sonetto 385/219° in dialetto
Paroni a casa nostra!
 
Dess che ’i ne’ a sufia-su fin’nt’el cadìn
de casa col referendum che vanza,
dess che in Cataeogna dal picenin
al vecio i ghe va drìo a l’anbueanza

dei senpioti golpisti, col baìn 
de essar magioranza e magioranza 
no li é ma li é quei che fa casin
e el casìn l’é tuta ’a so sostanza

me vien in mente el simiot leghista
che zighéa “Paroni!” in giostra 
co altri bauchi e co ’e bandiere a vista

«Ma fame rida, e fame un piazer...
Ti te ziga “paroni a casa nostra!”
parché  casa  comanda to mujer!»

542/242^- sonetto 386/220° in dialetto
’Vée da sposar un leghista!
 
Sì, dise benón me amiga Stefania
co ghe conte de ’a sìmia autonomista
che ziga come el mat co ’l se presenta
dal Bazaeùc1 a semenar zizzania

contro quei che sta casa e no dilania
i veneti, là insieme co un leghista
un paneter, un indipendentista,
e un che vede tuta zente strania,

che li pensa de no essar paroni
parché ’a grebana co lori in soasa
tut el dì ’a ghe desfranta i co…

«Ecco, ’vée da sposar un leghista
che me ’asséa dir almanco in casa;
e inveze ho sposà un comunista...»