1 ottobre 2015

529/219^ - s. 373/208 in dialetto
Ecco... 1
 
Se vede, se nasa lontan un mese
che ’a fa uso de calmanti e pastìche,
parché ’a te varda come un eschimese
(no ’a pol come a un eretico Eutiche);

se a spiegarte te piega col fochese1 
’assa star, é mejo che te te piche,
’e to paròe ghe ritorna blese,
e par un gnent te ris-cia ’e so ripiche.

Ahimè, la ha ’l gene de l’inversione:
quei pì scaltri, sveji e inteigenti 
(che sa rida) li vede come mone,

quei co l’aria tonta da presidenti
quei co ’i océti intensi da poltrone
beh, quei deventa i primi referenti.

5 ottobre 2015

530/220^ - s. 374/209 in dialetto
Ecco... 2
 
No, no l’ho sentìa, e che la èpie
fata davero no poràe giurarghe,
ma chi l’ha sentìa lo giura so ’e pì 
sacre madone, senza che me slarghe:

pararìe che sie success el de pì,
che da ’e maje tut altro che larghe
de ’a capa filtre umorismo  da Bèpi,
roba degna de na, anzi do targhe:

chealtro giorno... ha fat na batùa!
No so se varìe ridest un pero
come mi o se ’a jera in fiantin crùa

ma ’l é ’na speranza, parece un cero,
’a me opinion de éa ’a é zà cressùa.
 Spetén de veda se ’l é prima... vero!

9 ottobre 2015

531/221^ - s. 375/210° in dialetto
Ecco... 3
 
E sul pì bel che me iere convinto
che quando la vede me vien da rida
e perciò varde, col penin sospinto,
da chealtra parte o almanco sì da

no incrosar i oci pieni del pì finto 
sguardo rispetoso de ’a donna infida,
senza umorismo, ècome qua vinto
dal so saeudo in mezzo a’ movida:

eh sì, eh sì, propio inte chel momento 
iere sol che mi int’el coridoio
direto al saeón ross del sfinimento1

e ’a m’ha soridest a mi! Coss’ojo
da far? Me cae a sentar suìto drento, 
e’l mondo revess co quadri de boio...