’A fiera de Sant'Andrea
 
I l’ha ciamada Fiera de l’Oca
pa’ rievocar sani e antichi ideài 
de ’na rural dimension ormai fioca,
quando ’sti bipedi jera i porzèi

dei poreti; chi no ghe crede invoca
nessi pì storici che ai bottegài
non gh’intaressa, ché co ’a zente ’a é poca 
’sti discorsi ’i é del tut buèi….

Me par che ’sta roba e altre de ’a Fiera 
’e sie dei poìtici l’invenzion 
moderna pa’ trasformar quea che jera

na reigiosità inte un baraccon
de afari (i stivai no ’a é roba vera!)
che però dà senpre soddisfazion.

A fiera de Sant'Andrea_2
 
I l’ha ciamada Fiera de l’Oca
pa’ rievocar sani e antichi ideài 
de ’na rural dimension ormai fioca,
quando ’sti bipedi jera i majài

dei poreti; chi no ghe crede invoca
nessi pì storici che ai bottegài
non gh’intaressa, ché co ’a zente ’a é poca 
’sti discorsi ’i é davero banài….

Me par che ’sta roba e altre de ’a Fiera 
(i stivai!) pì che tradizion vera
’e sie dei poìtici l’invenzion 

moderna pa’ trasformar quea che jera
’na reigiosità inte un baraccon
de affari… che dà gran sodisfazion.