Nat a Conejan a fine de marzo 
del sessantaoto, se ’o imaginen
trevisan, classico tipo da spiaja, 
sera in discoteca e machina gaia;
un diploma conveniente in Agraria, 
e na faccia che varàe poést essar
anca quea del ranpol d’un siorét. 
Come tuti quei che no ha let 
tant ma ghe par de ver ’e idee 
’l é deventà consiglier comunàe 
fin da zóvane iscritt co ’a Lega 
in te quel de Sant’Urban de ’a Godèga. 

Nel giugno del Novantasete, 
no ’vendo ’a Lega facce rassicuranti
pì de ’a sua, ha puntà sul so viso
pa’a carega de ’a landa de Treviso.
e Zaia ’l é deventà presidente...
’L ano dopo ’l à sposà ’a so cubista 
(no, no na pitrice d’arte alieva 
de Braque, ma una de quee che s’assa beva
sui tacchi meza nuda in zima al cubo
o che se deremena streta a un tubo) 
e co éa ’l ha tacà a garejar
in fato de abronzature e de mar.

No ’vendo fat granché –  e perciò
gnanca maeàni – ’l é sta rielet 
presidente de ’a Provincia Gioiosa, 
dei concorrenti sbaragliando ’a rosa
col so bel 69 par zento.
Ma in provincia de Treviso ’a Lega 
rivinzaràe anca candidando 
Lipurgo Mirella o Giaco Mando...
Punto de forza del aministrator
jera stà ’l Progetto Rotatorie:
pì de tresento incroci trasformài 
in rotonde varie, fenomenài.

Tante volte el Presidente in persona,
come un novel duce, déa el via 
ai lavori co ’a prima piconada
del scavator; e un stradin lo bada 
a volta che’l ghe tien a far veda 
che lu sa ben pì che inpinzarlo:
monta su, prima mossa, zac! trancia 
un cavo dell’Enel e paese in Francia
par ore, come Woody Allen pazzo
in “Quattro criminali da strapazzo”
che al primo colpo da suìto ’l allaga 
el cunicoeo par rivar da’a paga.

«Altro punto di forza fu il rilancio 
del turismo di Marca Trevigiana, 
che, come confermano i nostri dati, 
ha dato lusinghieri risultati».
El dovéa restar ’n altri do ani
ma dopo ’e elezion regionài 
del Domìe e zinque, che le à vist
el centrodestra riafermarse pì trist, 
Zaja, pai so meriti alfin deventa
Vicepresidente de ’a Region Veneta
e Assessor a’ politica dura
del turismo e de l’agricoltura.

Infine, inte’l luglio Domìe e sete,
da ’na patuglia verso Conejan
’l é sta fermà (o l’hai parfin seguìo?)
che ’l coréa a pì de zentonovanta, drio
l’autostrada, proprio lu, bravo Zaja
co ’a perenne abronzatura da spiaja
lu che, da presidente, pa ’e cinture
el féa a campagna “Strade sicure”...
Quatrozent’euro de multa (mie! 
par chi che ghe ne ciapa novemie…)
diese punti de ’a patente de scroc
e ritiro de ’a stessa pa’ un bel toc.

Na radio ha dita che ’l s’ha scusà 
disendo che el véa un’emergenza
(e da quand’in qua ’l é cardiochirurgo?)
ma n’altra ha dat ’a misura de spurgo
del gradass restà in fondo el bocia
dei vinti ani co ’l hà definìo
“del tut anacronistici i limiti
attuali” ritegnendo sublimi 
nei abitati almanco i settanta 
e in autostrada i zentozinquanta...
Ma zentonavantatrè, caro Zaja, 
fa sempre quarantatrè sora ’a taja...