25 aprile 2008

377/141 - sonetto 266/135 Prospettive Fin jeri se jera tutti â cana del gas, i telegiornai batèa so ’a crisi de un’Italia che se rintana in casa pâ paura de ’a canèa dei rumeni e de ’a scoazza canpana, sul costo de ’a benzina e de ’a monèa, un’Italia comunista e putana messa in żenocio da Prodi Mortadèa. Adess che ’l Nano ha vinto ’e elezion i so giornai no parla che de decreti vacanze e ’j italiani in teevision che fin jeri jera tristi e poréti ’i é tant pì contenti e sta benon che in tut’e crociere ’i sta parfin streti.