8 luglio 2011

471/196 - sonetto 337/190° in dialetto
Senpre uguàe
 
Me amigo no segue nessuna dieta
eppur no ’l ingrassa mai de un chi’o:
el magna sie volte al dì; no ’l speta
gnanca de sentarse che ’l é ża drìo

ficar el bocon in boca co ’a forcheta:
ogni pasto consiste de un foltìo 
de portàe, da impenir na sacheta,
do litri de vin... e co ’l ha fenìo,

quando no ’l se buta so ’a majonesa,
el se beve ’l caffè, ma no na moca
da tre, da dódese; e ultimo, guai

a chi s’ażarda fermarlo, el se scròca
un bocaét de amaro. Epur el pesa
sempre compagno: giusto do quintai.