2-3 aprile 2020

582/254^ in dialetto
Ma che pecà
É vinti ani che me dise: ma che pecà 
che ’a destra epie lìder che fa pianza:
prim’a Lega, co Bossi laureà

sol che par lu, co ’a canotiera in panza,
un sbrodoear da taverna, sesti
da ciacoéta de nessuna sostanza,

inzinganà dal zercio magico de disonesti
che dopo ’e scóe de Maroni sassofonista
a far net no é restà gnanca i zesti...

E po’l bauc senpiat razista,
’l ignorante felpeta che no’l sa gnent 
ma lo dise da bravo oportunista,

che’l fa pagar a l’Italia el veén 
de ’a Bestia, machina fenomenal
che sbròdoea fango co lu darent

a scadenar ’l insulto del cocal,
del mona, del vioénto, del pometi
e del analfabeta funzionàl;

vizin de lu un medio ’fà Giorgeti,
no na cima, passa par eminenza 
grigia, genio dei verdi duri e streti...

E i fassisti, prima col bel semenza 
che a Montecarlo ha trovà i so tarli, 
po i cojonèi (Larussa, emittenza

Gasparrï, e Storazza) che a pagarli 
el giusto saràe da mirarghe ’a pata
co ’a ponta del pìë e là ciaparli...

E adess ’a bionda sbraitona e coata 
sovranista de ’a suburra romana 
che fotoshop fa senbrar na gata

“sono una donna sono cristiana”
regina dei casapound de l’Urbe
ma del ragionar zigàgnoea vana.

E Forza Italia co Silvio pien de turbe,
“in campo” a sistemar i fati sui
co tut el trào de putane furbe 

(anca i mas-ci) e guastatori, mui
de ogni vision del interesse general,
in sèa par pì de vinti ani... bui.

Pensa se inveze de chel arsenal
da spot, mero conprador de voti 
che spacéa par rivoeuzion liberal 

el riciclo de un sac de pinpinoti,
ghe fusse sta’ na classe dirigente, 
meza Merkel, o liberài manco sproti...

Pensa... Ma ’l error ’l é tegner a mente 
che quei sie stati sol che quatro erori
e anzi par ’a Destra un incidente:

lo ricorda i sondaggi su de lori;
no, no ’a podéa ndar in altra maniera,
co ’conomisti veri, gran signori: 

’a Destra se ritrova prigioniera
de chei lìder no parché sfigàa
ma parché soto soto patumiera.