Dormitorio

Musil, dise ’a cagoneta contenta,
’l é el dormitorio de San Donà, 
ripetendo ’a batua inveenada
che sol liti de campanil fomenta.

No, el dormitorio de San Donà
dise altri, ’l é de qua, ’l é Noventa,
smentii da quei che no se contenta
de essar ’na uscita de autostrada.

Fossalta po’ gnanca no la contén
che, par quante case nove che ’i fae, 
’a é ancora campagna depressa;

quel che invero fa pensar al veén
’l é che anca San Donà, senza bae,
no l’é che’l dormitorio de se stessa.