I gemelli del rock
E io so quanto dia loro fastidio essere accomunati | |
3 dicembre 2023 | |
655/275^ Beh, se te fa chea vita là te toca un fià drogarte, e sperar in pochi dani quel che fa spezie ’l é a setanta ani sentirlo rajonar ancora, porca loca, come el bocia èbete senza libri senza derivate, un fià zóca no pì in zerca de un destin ma de na boca che mete na peza ai squilibri... No a caso no li é i saviaboni che se raduna ai so raduni, co ’a boca verta, a’ cultura immuni, al senso irrisolti, un fia s-cioponi insieme a un foltìo de bauchete che co parte “Rewind”, tute infenàe ziga, smania e monta sora ’e spàe de qualchidun, e mostra ’e tete. |
656/276^ Na serie de pose insulse, un saraban de monàe stanpàe so ’a facia tarda da median co ’a chitara al zenocio che fa colpo so ’e putèe, stivaéti, braghesse e gié de pèe caveàti longhi da macio e s-cione de espression idiote e crude sora bicipiti e spàe nude... Lu che ogni dì “conpone” canzonete tute conpagne sproloqui senza musica, co do note, de numero, abusi infinite lagne |