18 settembre 2024

669
Che bèe ’e poesie de Andrea
 
Brava 'a Stefania
a tentar de spiegar un poeta
żente che par natura no ama
spiegarse
né ha bisogno de publico

bel
veda tanti ex alievi
a scuoea de sera
pal so vecio prof
tuti atenti
Chissà se i capisse el diaèto
de Longega, che anca 
quando el parla in italian
par che'l parle in diaèto 
venezian

Musica de paròe
che se guadagna suìto el siénzio
Pecà pa' 'a toseta in parte
che tossisse come na racoéta
Huf huf huf
senza pause
e pal tosatel un fia pì indrìo
che tossisse pì de rado
Hoeoff
ma co na convinzion
che lo fa tut ross
ingaeà

Dolze el rodoear de Venezia
sui versi de Andrea
Sère i oci
parché me par de sentirlo mejo

Un fià ghe sta 'l aconpagnamento de Igor
ma no quando 'a nota bea
massa forte
va par sora de 'a paròea
probabilmente pì bea

E intant 'a toseta in parte
Huf huf huf
l'aria stuàa
par 'a fia de un long covid

Concentrà sui versi
oci in tera par no farme portar via
dae teste
varde 'e scarpe soto 'e careghe
quee de 'a toseta de 'à del coridoio,
quee del bocia do fi'e pì vanti
	Tante Nike

Huf huf huf
Hoeoff

El tosatel davanti de mi
pien de brufoi e coe lenti astigmatiche
rimedia co 'e Air Jordan
a un sentimento de insuficienza

E intanto anca 'a Marica tossisse in prima fia
ma sol che ogni tant
ché oramai sinte
tuti quei che tossisse

Huf huf huf
Hoeoff

Hf

ma quando che Andrea parla del si'enzio
e int'el si'enzio leże
'a so poesia restituisse mondi
ormai ndati
tut 'a coverże co na patina
de mainconia