Tira aria nova: se candida questo, 
se candida quel, ’i ha i stessi disbrighi 
d’ufficio o de scuoea, come int’el resto,

’i é diversi cofà un zesto de fighi,
’i pensa compagno, ’i fa e stesse robe
’i é fradèl, marìo, mojer e amighi.

’i é i stessi che rimastegando sbobe
de veci discorsi se vea erett
a capiclasse pur ’vendo spae gobe,

che dopo ’i s’ha proposto pal distrett
e pal quartier, che in parrocchia ’i s’ha moss
par primi vendo el riflusso a dispett.

Adess che ’i é grandi, contro el pì gross
parlamento de ladri e lestofanti,
’i s’ha convinto de ver saltà’l foss

de ’a poìtica: ’i risponde a quanti 
ha dei dubi su tuti i portatori 
de istanze che li spinze a farse vanti 

e ’i se candida “ché ghe toca lori”:
par far vaér, almanco questo ’i sogna,
nove idèe e vantiere de vaeori;

no ’i é mai stati boni o ’i se vergogna 
de far rida, ’i scrive appelli conpunti 
a lezar te vien da gratarte ’a rogna,

che ’i poéa almanco ’verli riassunti. 
Soto soto, da l’ambizion ’i é rosi,
che ’a ghe dà continuamente spunti,

e da na maeatìa che fa s-ciosi,
che li porta a lecar qua e deà,
’na maeatìa bruta: ’a “candidosi”.