19 gennaio 2026

752/286a in dialetto 

Il mondo visto dalla campagna
 
Me mare, quinta elementare,
cressùa in ciesa, vardéa come mostri
i comunisti marxisti
del paese, quattro ateisti
co do libri leti e quattro visti,
vizini a Autonomia Operaia
naneti brigatisti del vénare
che teorizzéa 'e pistòe 
e s'ha fat vegner cior de note, co 'a zénare
calda, dae camionete dei carabinieri

Ho pensà che 'a vesse del mondo
na vision meschina
che no 'a jera ndata a fondo
che parfin Berlinguer, 
co 'a facia senpre incazzada, da cativo,
da boer, da belfagor redivivo
vesse na qualche rason...
anca se'l ghe véa mess na vita 
pers pal caìvo
a capir che el comunismo
jera 'a mort infinita...
onesto, sì, ma teston

Ma 'a me Sinistra jera Eco, Pasolini,
Guglielmi, Asor Rosa, 
e tanti altri maestri veri, 
purtroppo maestri de jeri,
parché i astri de dess li é
Odifreddi, Di Cesare, Rovèi,
Barbero, Montanari, Orsini... 
che 'i ha tuti studià calcossa,
che par calchidun i varà anca 'a testa grossa,
ma a mi i me par tant na banda de stornèi

Sgionf el primo, che su 'a Ciesa el spua senza ritegno
ìdoeo dei otentoti
e che saràe ancora in Russia 
a dormir sui fagoti de na branda de legno
se no lo riportéa casa Andreoti

'A seconda, patentada,
che parla inderegada,
amiga de 'a Balzerana brigatista,
che in do 'e ghe n'ha fat
de figure da cùeo e de maeani,
gnancora rinsavìe a setanta ani

Fuffa Montanari
pì folp dei canpagnari
che de tutte 'e lune pontàe
vede sempre el déo che ponta

Orsini, el massimo de 'a frescura,
che “So nono vivéa contento soto 'a ditatura”
simpatico come 'a merda
uno che saràe ben 'assar perda
ma ghe pensa 'a Bianchina, 
nostra signora dei mentecatti, 
fia del teston,
a farlo risaltar tra quatro mati

Un fià me despiase pal fisico,
de cui lezée vo'entieri vinti ani fa
i articoli so 'a relatività
e che m'ha fat studiar 
quel che Matematica no me vea regaeà
e che dess ogni do par tre el dise na cagàa
che un se domanda se la epie anca pensàa

e me despiase pa' Barbero, par cui, confesse, 
ho vu na enorme sinpatia, 
parché el me véa fat vegner voja
de studiar storia 
e geografia
ma par che in testa no ghe se squaderna
el senso tragico de 'a storia moderna

In tuti sti sapientoti e sapientini 
 é restà viva l'ideologia
'a gabbia che tute 'e libertà stroza via
soprattutto quea de rajonar 
liberamente 
che te consente de no sembrar 
un poro marxista
deficiente.