EL ME ADRIANO
Mi te confesse, Adriano
senza che te ’o voesse t’ho scelto
parché un Gesù dai cavéi de oro
’l à za n’aureola in testa
a difarenza de un Gesù moro 

Voée un Gesù co a barba ciara , da ator,
che’l ghe strenzesse el cuor 
a femene ’e tosete
a dòne e veciete

Ne l’enfasi co cui t’ha alzà ’e man
verso el porocan de Giuda
par dir ’a to paròea nuda
tut jera vero in quel momento:
e mi piena de sentimento:
son stata minuti a vardarte 
tut ciapà dea to parte…

Ma adess 
son sincera 
torna soa tera dopo sta festa
no sta métarte in testa 
de voer deventar vescovo o papa
ma gnanca prete o diacono
no je tempi questi da barzeete
Ti te si fat pa’ na fameja,
pa’ na dona che par ti se fae paveja

Mi te immagine a quaranta ani
co tuti i to cavéi 
longhi, biondi e ribèi
e torno torno nove o dièse putei…
Come voràe che te me ciamesse mi
a tegnerghene uno a battesimo 
fosse anca l’undicesimo
quel che nessun ha corajo 
de comandarghe 
parché el fa quel che’l vol,
e ciaparlo a brazzacol...





LUCA
Caro Gesù Bambin
mi son Luca dei Mariuzi dea Pia 
e uno dei cruzi
che rende triste a vita mia 
’l é che tuti me ciol in giro
parché son alt cofà ’na biro: 
al baeon, a scuoea, fora da messa
tuti me dise che son na nessa
e che se dae radise del formento 
vui vegner fora almanco col mento
me convien comprarme un caval
o do cavarete 
e montarghe par sora 
par deventar alt un metro e sete…

Parfin me zia
dise che son ’na busìa 
parché ho ’e gambe corte…
Mi par adess soporte 
ma se ti te me fa cressar na bea s-cianta
fin a un metro e otanta,
Gesù Banbin, mi te porte un fiasco de vin.





ORAZIO
’L é sta un strazio
a prima volta che ho vist Orazio, picenìn
nessa, sgarbin
co’ i oci e i cavei neri
pien de pensieri 
a matina
del primo giorno de scuoea
Me son dita:
“El premio dea to vita, Lisa
sarà traformar sto ripetente
in t’un bocia intraprendente”

L’ho ciapà co mi in banda
per farghe disegnar un albero e ’na strada:
e lu m’ha fat ’na casa granda 
coi archi e sbarozada
gh’ò fat disegnar un cubo
e lu me l’à inpenìo de cavéi neri 
co par soto un tubo!

Ma quando l’ho vist vegner zo pae scae 
del primo piano
fasendo l’aeroplano 
ho abandonà ogni progeto aulico:
“tubi o no tubi”
come dise Scecspir sol pi bel
secondo mi el tosatel
véa da far l’idraulico. 





MIGHEL
  
Tra i me tosatei 
ghe ne uno che sa lavorar coi déi 
in maniera eccezionale
e’l par Leonardo;
altri a dirla pa’ intiero
j’é bravi davero: una ’a é sarta
chealtro pitor... Uno purtropo
’l é anca tardo... 
ma Mighel ’l é l’inventor:
dea bici col voeante
par ’na guida rilassante
e de quea co do sèe pa’ i morosi
e de zento altri cosi 
strani
come el canestro invidà in tera
pa’ i nani

Mighel progetta co coscienza
inventiva e scienza,
col particoear preciso e giusto
e mi cate gusto 
a vardar da sora e so spae 
cossa che vien fora da’a matita
de chea testa geniae

Sempre el me disegna 
calcossa de fenomenal
un campanel che dà a scossa
se sona a maregna o a madona
el clacson che sona el samba,
a bici co un pedal
par quel che ha pers a gamba 
in guera o in ospedal

’Na matina ’l ha tacà a coeorar de nero
un foglio intiero
e po n’altro
e n’altro ancora 
par tuta l’ora

«Cossa fao el me tosatel..»
gh’ò domandà 
e Mighel int’el momento che’l s’ha fermà
el m’ha spiegà
che quee jera ’e luci de na festa
pa’ un ultimo de ano...
No ho avu corajo de dirghe 
che me paréa strano, che no poéa 
essar vera
tuta chea luce nera
pa’ na festa...
Forse che’l giorno el véa mal de testa...





GUERINO
Cari compaesani,
ho sempre tentà de parlar ben de tuti
cani, poricani e farabuti 
ma adess mi ve parle
de Guerino Tuninato
che no l’ha commess no nessun reato, par carità, 
però su de lu ho na verità
che finora no’ ho mai dita:
co lu a mia no’a é stata vita
scuseme se no’ riesse a star sita
se no lo fesse 
me pararia de no essar onesta...
far studiar Guerin no’a é stata ’na festa
ma ’na lotta senza fine, un destin:
parfin farghe disegnar un casuìn
o ’na caseta jera un cine:
lu me fea un cason 
stort, de rabalton

jera fin fadiga
farghe tirar ne riga dreta
quante volte mi speta,
lu me féa un segnat 
stort, su un foglio mat

’Na matina 
me son svejada
un fià straviada
e intant che bevée el caffè in te a cusina
ho lèt un so tema
e me vegnù un patema, 
ho capìo che no jere pì tajada
pa’ a scuoea:
“Cara Lisetta, ciapa tut e moea
a Guerino a scuoea ghe va streta” 
“Je in quarta, 
su, Lisa, l’ultima spinta, 
pòrteo fin in quinta”
me diséa a coscienza...
ma no ghe’o fata, ho butà zo pa’ a finestra
a me vocazion de maestra.
Lezendo e so frasi piene de senso
ho capìo che no lo véa pì
el me lavoro immenso
In chel momento calcossa dentro de mì 
jera mort, parché co’ Guerino
me jera senpre ’ndat tut stort.




JURA
Me son sempre domandada
ogni volta che fae a strada tornando da scuoea
el senso dei disegni che Luca me moea
sora a cattedra 
el me pìcoeo Vendraminet
co i ociai spessi e el sorriso stret…

Dime ti, Signor,
ti che gnente t’é forest
se no je strani sti disegni 
de un putel de oto ani…

Ho sempre savest 
che int’i disegni de un tosatel
se leze i segni dea soa vita
quel che ghe capita de bel 
e de brut
e soto de tut
anca quel che porae capitarghe in futuro
ma ogni rajonamento su de lori
te confesse che me par duro

Mi ò caro che ognun de lori
use tuti i coeori 
i coeori a cera 
dea vita vera 
ma lu l’usa sempre el coeor vinaccia
Éo un segnal? na traccia?

Coeor vinaccia el fa e case
el ciel, a stradèa, 
a banana che se péa, el caret
e se ghe dae calcossa 
de pì grandét da disegnar
no, no é da rida
el me fa ’na vida
anzi, el ghe ne fa sete o oto 
e po’ el se mete a rida
contento
par soto

Vide, tante vide, sui so disegni, 
le fa anca ben,
dovarae essar contenta…
ma me domande, Signor, 
de quando in quando:
cossa voeo far el me Luca da grando
meta su ’na feramenta?